雅虎香港 搜尋

早年生活

黃子華喺聖若瑟英文小學、聖若瑟英文中學、威靈頓中學讀過書，喺加拿大阿爾伯塔大學攞到哲學學士。1987年參加無綫電視舉辦嘅「全能司儀大賽」而踏入演藝界，做過代課老師、出入口經理、電台、臨時演員、資料搜集、電視台助導、話劇團演員、電台電視台節目主持、編劇、電影演員。黃子華以表演一個人喺舞台上講笑話嘅棟篤笑而為人熟悉，之後曾經喺無綫電視拍攝多部電視劇，包括《男親女愛》。黃子華亦係哈痞樂隊（Happy Band）成員（主音）。

入行經過

黃子華由加拿大返香港後，一心想做演員，但係當年無綫電視嘅藝員訓練班突然間取消咗，剩番編劇訓練班，黃子華希望能夠藉編劇喺電視城做嘢，再轉型為演員。後來佢發覺編劇係好難轉型為演員後，輾轉加入香港話劇團、電台DJ等等。根據黃子華自己形容，呢段時間係佢人生嘅谷底。 1990年，佢決定將自己喺娛樂圈嘅經歷，改成棟篤笑演出以證明自己嘅才華，之後就退出娛樂圈。不過，黃子華嘅棟篤笑大受歡迎，深入民心，最後佢放棄咗離開娛樂圈嘅念頭。 1999年，徐正康開始揾佢拍劇加盟無綫電視，拍佢嘅第一套劇集狀王宋世紀2，成績未如理想，到開拍男親女愛處境喜劇就人氣大升，成為視帝大熱，之後2004年棟篤神探、2008年奸人堅、2009年絕代商驕都維持係黑馬視帝。 2013年，黃子華喺萬千星輝頒獎典禮憑My盛Lady奪得最佳男主角（即視帝），一洗多年維持嘅成績突圍而出。

私人生活

黃子華曾先後同無綫藝員潘芳芳、模特兒劉婉君相戀。另一個女友溫安妮（Annie），任職化妝師，人稱「翻版關詠荷」，細佢十六年，兩個人由2002年開始相戀。 後來，有唔少報導指佢同相戀好耐嘅Annie，一早喺加拿大註冊結婚，不過當事人已經一概否認。喺2012年兩個人已經和平分手。